केकीको अभिनय र संवादले हसाउँछ ‘भाग् सानी भाग’मा

शुक्रबारबाट प्रदर्शनमा आएको फिल्म भाग् सानी भाग्ले शनिबार राम्रो व्यापार गरेको यसका प्रस्तुतकर्ता चेतन सापकोटाले बताए । शनिबार नै फिल्म हेर्नका लागि काठमाण्डौको सीभील मलमा पत्रकारहरुलाई पनि निम्तो दिइएको थियो ।

फिल्म हेरिसकेपछि अधिकांश पत्रकारले यसको उठान गरिएको बिषयवस्तु र अभिनेत्री केकी अधिकारीको कामलाई तारिफ गरेका छन् । विशेषगरि, केकीले बोलेको पश्चिमको भाषाले काठमाण्डौका दर्शकलाई बढी मनोरञ्जन गरेको छ । सधै फिल्ममा आफ्नो द्धन्द्धात्मक भूमिकाका कारण चर्चामा रहेका अभिनेता सविन श्रेष्ठले यसमा अभिनय पनि राम्रो गरेको समिक्षा पत्रकारले दिएका छन् ।

फिल्म ‘भाग् सानी भाग’लाई नवल नेपालले निर्देशन गरेका हुन् । फिल्ममा सविन श्रेष्ठ, केकी अधिकारी, रमेश वुढाथोकी, सुशिल पोख्रेल, गीता अधिकारी लगायतका कलाकारको मुख्य भूमिका छ । फिल्मले अभिनेत्री बन्नका लागि बिहेको मण्डपबाट नै भागेकी सानीको कथालाई उठाएको छ । ग्रामिण नेपाली भूभागको परिवेश वुझ्न र हाँस्नका लागि यो फिल्म हेर्न सकिनेछ ।