५ बर्षपछि विराज र रोज एकसाथ फर्किए, निशा पर्शुराममा राधा बन्दै

फिल्म अभिनेता विराज भट्ट करिब ५ बर्षपछि फेरि नेपाली फिल्ममा फर्किएका छन् । करिब ५ बर्षदेखि नेपाली फिल्म छाडेर विराज भोजपुरीमै रमाएका थिए । भोजपुरी फिल्ममा स्टार बनेका विराजलाई निर्माता रोज राणाले पर्शुराम फिल्मबाट फर्काएका हुन् । करिब ५ बर्षपछि रोज पनि फिल्म नगरिमा फर्किएका छन् । उनले फिल्म टक्कर दुई मुटुको बनाएर असफल भएपछि यो क्षेत्रबाट टाढा भएका थिए ।

काठमाण्डौमा आयोजना गरिएको पत्रकार सम्मेलनमा फिल्म पर्शुरामको घोषणा गरियो । विराजका साथमा निशा अधिकारी, रविन तामांग फिल्मका मुख्य कलाकार हुन् । फिल्मलाई पूर्णरुपमा एक्सन शैलीमा बनाउन लागिएको छ । निर्माताबाट निर्देशक बनेका रोजले आफूले ५ बर्ष कस्तो फिल्म बनाउने भनेर गहन अध्ययनमै बिताएका बताए ।

अभिनेता विराज भट्टले आफू फिल्म क्षेत्रबाट टाढा नभएको भन्दै एउटा उद्योगबाट अर्को देशको उद्योगमा मात्र गएको बताए । अभिनेत्री निशा अधिकारीले फिल्ममा आफू राधाको भूमिकामा देखिन लागेको बताइन् । भोलीबाट छायांकनमा जाने यो फिल्ममा रामेश्वर कार्कीको छायांकन, एनवी महर्जनको द्धन्द्ध, महेश खड्काको संगीत समावेश छ ।

कार्यक्रमकी प्रमुख अतिथी नेपाली कांग्रेसकी नेतृ आरजु देउवाले पर्शुराम बनेका विराजलाई लामो परशु दिएकी थिइन् । फिल्ममा विराजले सोही हतियारबाट खलपात्रसँग भिडन्त गर्नेछन् ।