अम्बरे प्रचारशैली : श्रीपेच लगाएर गद्दीमा सौगात, छेउमा केकीको साथ (फोटोफिचर)

मज्जाको अनलाईन समाचार, काठमाण्डौ, कार्तिक २८–

नायक सौगात मल्ललाई गद्दी आरोहण गर्नका लागी बोलाइयो । गद्दीमा बसाएपछि उनलाई श्रीपेच लगाइयो । त्यसपछि नायिका केकी अधिकारीलाई पनि उनलाई साथ दिनका लागी छेउमा ल्याएर बसाईयो । यो दृश्य शुक्रवार दिउँसो राजधानीको अनामनगरस्थित युनियन हाउसमा देखिएको हो ।

मंसिर ०५ गतदेखि सार्वजनिक प्रदशर्नमा आउन लागेको चलचित्र ‘श्री पाँच अम्बरे’ को नँया प्रचार शैलीको रुपमा सौगातलाई गद्दी आरोहण गराइएको थियो । जँहा चलचित्रमा ‘अम्बरे’ बनेका सौगातलाई ‘काली’ बनेकी केकीले साथ दिएकी थिइन् ।

गद्दी आरोहण गरेका सौगातको छेवैमा बसेकी केकीले संचारकर्मीलाई अम्बरेमा आफुहरुले धेरै मिहेनत गरेका बताइन् । श्रीपेच लगाएका राजाको छेउमा बस्न पाउँदा आफुलाई रमाइलो भइरहेको पनि उनले सुनाइन् ।

दिपक आचार्य र टिएन आचार्यले निर्माण गरेको यस चलचिलाई दीपा बस्नेतले निर्देशन गरेकी हुन् । दीपाले यसअघि ‘अन्तराल’को निर्देशन गरेकी थिइन् जसले दर्शक र समिक्षहरुको राम्रो प्रतिक्रिया पाएको थियो । ‘मैले ‘अन्तराल’ बाट धेरै कुरा सिक्दै ‘अम्बरे’ लाई स्तरीय बनाउन कुनै कसर बाँकी राखेको छैन् ’, निर्देशक दिपाले भनिन्– ‘त्यसैले चलचित्रबाट सकरात्मक प्रतिक्रिया आउने आशा राखेकी छु ।’

कार्यक्रममा डिसिएनका अध्यक्ष अशोक शर्मा, द्वन्द कलाकार संघका अध्यक्ष योगेन्द्र श्रेष्ठ, चलचित्र प्राविधिक संघका अध्यक्ष मनोज केसी लगायतले चलचित्र सफलताको कामना गर्दै मन्तव्य राखेका थिए । कार्यक्रम सकिएपछि नायक सौगातलाई गद्दीमा राखेर शहर परिक्रमा गराइएको थियो ।

नेपालमा राजा हटेको लामो समय बितिसक्दा पनि व्यक्ति र समाजमा राजा बन्ने प्रवृत्ति कायमै रहेको छ भन्ने विषयलाई देखाउन खोजिएको यो चलचित्रमा सौगात र केकीका अलावा विक्रम सिंह, सिर्जना अधिकारी, मार्टिन खान, राज गोदाइली लगायतका कलाकारहरुको अभिनय छ । प्रियंका कार्की र यमबुद्ध पनि विशेष भुमिकामा रहेका छन् ।

दर्शकको मन खिच्न यस चलचित्र युनिटले अनौठो प्रचारशैली अपनाउँदै आइरहेको छ । तर ‘अम्बरे’ ले दर्शकको मन कत्तिको जित्ने हो त्यसका लागी मंसिर ०५ पर्खनैपर्छ ।

– अनिल यादव