निर्देशक नेम्वाङको शव पोष्टमार्टमका लागी टिचिङ अस्पतालमा

काठमाण्डौ, कार्तिक २१–

हिजो राती झुण्डिएको अवस्थामा फेला परेका चर्चित फिल्म तथा म्यूजिक भिडियो निर्देशक आलोक नेम्वाङको शव अहिले टिचिङ अस्पताल महाराजगञ्जमा पोष्टमार्टमका लागी राखिएको छ । एक घण्टाभित्रमा पोष्टमार्टम गरिसकिने बताइएको छ ।

पोष्टमार्टमपछि पत्रकार सम्मेलन गरेर घटनाको विषयमा जानकारी दिने तयारी भइरहेको श्रोतले जनाएको छ । नेम्वाङको शव हिजो राति ८ वजे धापासीस्थित आफ्नै अपार्टमेन्टको बाथरुम छेउको रेलिंगमा  झुण्डिएको अवस्थामा फेला परेको थियो ।

नेम्वाङले आत्महत्या गर्न अघि एक सुसाइड नोट छाडेको रहस्य खुलेको छ । प्रहरीले यसको विषयमा थप जानकारी नगराए पनि उक्त सुसाइड नोटमा ‘पलपल बाँचेर मर्नुभन्दा बरु एकैपटक मर्नु आनन्द’ भन्ने वाक्य लेखिएको कुरा श्रोतवाट खुल्न आएको छ ।

‘सानो संसार’, ‘कोही मेरो’ जस्तो चर्चित फिल्मको निर्देशन गरिसकेका नेम्वाङको ‘अझै पनि’ चलचित्र यही फागुन १५ गते रिलिज हुने तयारीमा थियो । अहिले सम्म अविवाहित रहेका नेम्बाङले दर्जनौं म्युजिक भिडियो निर्देशन गरिसकेका छन् । निर्देशक नेम्वाङको यो दुखद खबरले अहिले सिंगो सिने नगरी शोकमय बनेको छ ।