जनवादी हजुरबुवाकी मनवादी नातिनी (भिडियो सहित)

सांस्कृतिक क्रान्ति नै गर्नुपर्छ भन्दै जनयुद्व समेत हाकेका, माया पिरती विकृति हो भनेर तत्कालिन समयमा ब्याख्या गर्न समेत भ्याएका प्रचण्डकी नातिनीले भने मनवादी संस्कृतिलाई अंगालेकी छिन् । उनले जनवादी होईन मनवादी संगीत रोजेकी छिन् । उनले गाएका माया पिरतीको गीतले यतिबेला चर्चा पाउन थालीसकेका छन् ।

एकीकृत नेकपा माओवादीका अध्यक्ष पुष्पकमल दाहाल प्रचण्ड की नातिनी स्मिता दाहालले गाएको नयाँ गीतको भिडियो भर्खरै सार्वजनिक भएको छ । एल्बम ‘स्मिता’मा समावेश गरिएको ‘प्रिय तिम्रो’ बोलको गीतको म्युजिक भिडियोमा नायिका प्रियंका कार्की र नायक रेश मरहठ्ठालाई देख्न सकिन्छ ।

सानै देखि गायनमा रुचि राख्ने स्मिताले गाएको ‘साना साना नानी’ बोलको बालगीतबाटै उनको गायनको चर्चा शुरु भएको थियो । १६ बर्षीया स्मिताको एल्बम ‘स्मिता’मा समावेश  ‘प्रिय तिम्रो’ बोलको गीति भिडियोलाई धिरज जंग शाहले छायांकन गरेका हुन भने टेकेन्द्र शाहको सम्पादन रहेको छ ।

गीतमा शब्द संगीत रेशमराज भट्टराईको छ । प्रशन्न पौडेल निर्देशित भिडियोमा मायामा हुने उतारचढावलाई  देखाउन खोजिएको छ । गायीका स्मिता, प्रचण्डकी छोरी गंगा दाहालकी छोरी हुन् ।